Regala vida
Muro Violeta
Unha parede conmemorativa e de memoria colectiva para lembrar as vítimas de violencia de xénero e violencia vicaria.
Que é o Muro Violeta?
O Muro Violeta nace no voluntariado de ASAMPO (Asociación de Amigos da Pontevedrada), unha entidade cuxo principal obxectivo é informar, visibilizar e concienciar sobre a importancia da doazón de órganos, sangue e tecidos.
O Muro Violeta é unha parede conmemorativa e de memoria colectiva, creada para lembrar as vítimas de violencia de xénero e violencia vicaria en España.
O Muro está formado por 2.322 azulexos de 10×10 cm, distribuídos en 129 azulexos en horizontal e 18 en vertical, con 48 espazos reservados para carteis informativos e servizos do propio centro.
Cada azulexo presenta unha vida arrebatada. Nel recóllese o nome, a idade, a data e o lugar do asasinato. O Muro reúne os nomes de todas as mulleres e nenos asasinados en España desde o ano 2000 ata 2025.
Na primeira fase de execución empregáronse 88 horas de traballo.
O Muro Violeta non só é un espazo de homenaxe e memoria, senón tamén un recordatorio permanente da importancia da sensibilización, a educación e o compromiso social para construír unha sociedade libre de violencia.
Visitas guiadas para grupos e centros educativos
Cremos que a educación é a base para erradicar a violencia. Por iso, abrimos as nosas portas a grupos organizados, escolas, institutos e organizacións que desexen realizar unha visita guiada.
- Obxectivo: fomentar a concienciación e a sensibilización, especialmente entre a adolescencia, axudándoa a identificar condutas de risco e a valorar a importancia da igualdade.
- Contido: durante a visita explicarase o propósito do muro, afondarase no impacto da violencia de xénero e promoverase un espazo de diálogo e reflexión crítica.
- Adaptabilidade: adaptamos a mensaxe e a dinámica da visita segundo o perfil do grupo ou a idade do alumnado.
Para solicitar unha visita, escríbenos.
