Quen somos

Quen somos

Un grupo de voluntarios decididos a promover a Doazón Universal de sangue, órganos e tecidos.

Estamos convencidos de que, se houbese máis información, habería máis doadores e, en consecuencia, menos falecementos, e por iso estamos dispostos a berrarlle ao mundo que a doazón salva vidas.

A nosa base de operacións atópase en Pontevedra, pero nalgunhas das nosas actividades participa xente de todos os recunchos de España e mesmo doutros países.

Non o leves contigo, déixao aquí: o maior regalo é unha segunda oportunidade.

Que facemos

Todas as nosas actividades están enfocadas a promover a doazón, e ese é o motivo polo que consideramos que todos os proxectos son igual de importantes.

Con todo, non podemos negar que o que nos deu a coñecer, de forma máis exponencial, ao longo destes últimos anos, foi a nosa Marcha Solidaria Nocturna entre Pontevedra e Santiago de Compostela: «A Pontevedrada».

Ademais, tamén organizamos mesas informativas ao longo do ano coas que tratamos de concienciar a poboación sobre a importancia da doazón.

No ano 2017 levamos a cabo «Xuntos no Camiño», un proxecto conxunto con outras asociacións sen ánimo de lucro, no que realizamos o Camiño de Santiago Portugués por etapas, tratando con isto de dar visibilidade a cada unha das patoloxías que representa cada asociación.

Entre os nosos plans futuros está o de dar charlas nos colexios para normalizar o concepto de «Doazón» entre os máis pequenos, así como organizar outras actividades para involucralos nun tema que consideramos de vital importancia como persoas e como sociedade.

Leva a solidariedade nas veas, déixaa no corazón doutros.

Valores

• PaixónSó traballando desde o corazón e facendo o que realmente nos gusta poderemos conseguir todo aquilo que nos propoñamos.
• EquipoPorque xuntos somos mellores e poderemos chegar máis lonxe. O lobo solitario non sobrevive.
• ColaboraciónÉ imprescindible valerse do talento colectivo e das sinerxías con outras asociacións para que o noso obxectivo chegue a máis persoas.
• IntegridadeSó desde a transparencia xeneraremos a confianza que buscamos no outro.

Misión

Promover a Doazón Altruísta Universal de sangue, órganos e tecidos.

Visión

Conseguir un maior número de doadores en España e no mundo para reducir o número de mortes provocadas pola falta de sangue, órganos ou tecidos. Normalizar a «Doazón» entre os máis pequenos, pois os nenos de hoxe son os adultos de mañá.